دليل السعادة بتاعي :)

أي بني آدم عايش في الدنيا دي بيسعى في حياته إنه يبقى سعيد و بيعمل أي حاجة معتقد إنها ممكن تخليه سعيد حتى لو حاجة غلط ... و فيه ناس بتربط سعادتها مثلاً بحاجات معينة زي اللي يقول أنا لو معايا عربية كان زماني أسعد واحد في الدنيا!
السعادة سهل تتحقق .. مش صعبة والله ..أي حد ممكن يبقى سعيد لو مشي على المبادئ دي :

● خليك ريلاكس.متقفش على نفسك.متاخدش الحياة بطريقة جد عن اللزوم.مالحياة ماشية ماشية ... قال يعني لو عقدتها هتمشي على مزاجك! خليك فريش كدة و متفكرش في الحياة و تحللها بطريقة مأساوية و تقف على كل حاجة تحصلك أو تتقالك و تندب حظك و تقول أنا أصلاً حظي وحش أو الدنيا بنت التيييت دي معاندة معايا أو مدياني وش بلاستيك! متضغطش على نفسك بالتفكير في أمور إنت ملكش يد في تغييرها... المشكلة دي من أكبر الأسباب اللي بتولد مرض الضغط و بتسبب مشاكل جسمانية و نفسية كبيرة! حاول تضحك دايماً و تخلي الضحك ده جزء من روتينك العادي ...الضحك ده علاج فعال جداً لأي مرض في الدنيا ... و بيخلي الحياة أسهل بجد ... بس مش هيمحي المشاكل يعني .. ماهو الحياة عمرها ما هتكون حلوة لو كلها مشيت على نبرة واحدة حلوة أو وحشة ... يوم حلو و يوم وحش ... هي دي الدنيا .. بس النقطة هنا ... يا ترى أنا في الآخر اللي هضحك ولا الدنيا اللي هتضحك عليا!!

● إبتسم. أد إيه الإبتسامة دي هتفرق جداً معاك. في ناس بتصحى من النوم مكشرة و كفرانة من عيشتها و تلاقي يومهم بقى مهبب و منيل و كله مواقف وحشة.و فيه ناس بتصحى عارفة إن يومها هيبقى متعب و مجهد بس بيبقوا مبتسمين و سبحان الله ييجوا آخر اليوم تلاقيهم مبتسمين برضه و الحياة حلوة. الإبتسامة لوحدها بتخلي الجسم نفسه ريلاكس .. مانتا إديته الإنطباع إنك سعيد فطبيعي الجسم يبقى مستريح و الدم بيجري على مهله في عروقك و حواجبك مش لازقة في بعضها.ثانياً الإبتسامة نفسها و هية مرسومة على الوش كدة بتخلي اللي قدامك يستريحلك و يتعامل معاك بسلاسة أكتر سواء في الشغل أو في الحياة عامةً و ده يخلي الحياة أسهل طبعاً.

● متركزش في الحاجة الوحشة و بس. دايماً فكر في الحاجة الحلوة. عمر ما في إنسان في الدنيا دي مفيش عنده حبة حزن في حياته..مفيش حد سعيد طول الوقت أساساً.بس اللعبة هنا بقى في إني أخلي السعادة تطغى على الحزن أو الكآبة.صعب إن حد يغير الماضي .. بس مش صعب إننا نستمتع بالحاضر و نسعى إن المستقبل يبقى أحلى و أحلى ..القصة هنا كلها في إني أتقبل اللي حصللي خلاص مهما كان و أتعامل على الأساس ده من غير الإحساس الفظيع بالعجز .. الإنسان اللي متقبل حياته بكل الل فيها و كان فيها من حلو و ووحش ... ده إنسان سعيد.

● خليك دايماً راضي بحياتك و شاكر لربنا إنه وهبك حياتك اللي إنتا فيها. عمر ما إي إنسان هيبقى سعيد لو مش راضي بحياته واللي ربنا قاسمهولوا.أخطر حاجة أي بني آدم ممكن يعملها إنه يقارن حياته بحياة حد تاني! الإنسان لو إقتنع إن في الدنيا دي مفيش حد أحسن أو أوحش من حد بس ربنا قسم الرزق بطريقة معينة و ليه حكمته فيها أكيد .. هيبقى سعيد و في قمة الرضا بحياته و هتلاقيه دايماً بيقول " أنا كدة ميت فل و أربعتاشر :) " .. لو حد عارف إشمعنى أربعتاشر يقوللي :)

● من الحاجات اللي ممكن تخلي أي واحد يتقلب 180 درجة من قمة سعادته لقمة حزنه إن حد ينقده!مش معنى إن حد ينقدك إنه بيكرهك مثلاً او إن إنتا إنسان وحش .. على العكس ده معناها إن اللي بينقدك ده أصلاً مش راضي عن نفسه كمان! و خليك دايماً صديق نفسك الأنتيم .. خلي الصراحة بينك و بين نفسك شيئ أساسي .. دايماً حاول تشوف نفسك بكل صراحة و إنتا هتعرف فعلاً إذا كنت إنسان وحش ولا حلو.

● دايماً فكر في الأهداف اللي تخليك سعيد على المدى الطويل مش القصير. الأهداف اللي مداها قصير متعتها لحظية و بتسيبك في حالة أسوأ من الأول زي المخدرات مثلاً ... تلاقي واحد متضايق قاللك بس مفيش غيرها ..سيجارة ملفوفة مع كوبايتين أصفرة و الموود هيبقى آخر تظبيط ... يضرب يضرب يضرب و بعد كدة تلاقي مش دريان بالدنيا .. أول ميفوق تلاقيه مخنوق من الدنيا أكتر من الأول!!! طب إيه الفايدة والنبي طيب!! الواحد لو عايز يبقى أسعد لازم يفكر في أهداف تفضل سايبة بصمتها في حياته و تدوم مع الوقت .. مش مجرد متعة لحظية و بتعدي!

● دايماً حاول تركز إن تفكيرك ذات نفسه يبقى حلو و سعيد و صحي كمان! لأن تفكيرك هوا مووودك هوا اللي بيخلي إحساسك سعيد أو مش سعيد ... خلي تفكيرك إيجابي مش سلبي .. يعني متفكرش في الحاجة اللي تنرفذك أو تضايقك أو تقلب مزاجك أو تعصبك أو حتى تحزنك.. فكر في حاجة حلوة ... حاجة تخليك تحس إنك مبسوط و فريش ... فكر في موقف ظريف .. مسرحية كوميدية ... حد بتحبه .. كل دي حاجات أكيد هتديك إحساس جميل.

● طور من علاقاتك الحياتية و الإجتماعية .. دايماً الإنسان السعيد في حياته تلاقيه ليه علاقات بناس كتير و الناس بتحبه و بتحب صحبته كمان.من الحاجات المهمة عشان الناس تحبك إنك تبقى إنسان محترم و مش قليل الأدب. و دايماً متخليش علاقاتك مع الناس علاقات سطحية .. أي حد بيحب اللي يسأل عليه و يهتم بيه .. أي إنسان محصور في نفسه و في حياته .. و يحب أوي اللي يهتم بيه و بحياته و يسأل عليه مثلاً و يعرف أخباره أول بأول.

● دايماً إختار أصدقائك بعناية .. الأصدقاء هدية ربنا لينا .. دايماً الصديق اللي بجد ممكن يكون أقربلك من أخوك اللي هوة إنتا و هوة من بطن واحدة .. فحاول إنك تختار أصدقائك بعناية لأنهم هيفرقوا معاك أوي ..

● لو فشلت بعد كل ده إنك تبقى سعيد .. الحل بسيط قوي .. حاول تخلي شخص تاني سعيد ... ساهم في إن الناس يبقوا سعداء و أكيد أكيد لو حد بقى سعيد بسببك إنت هتبقى أسعد منه. متبقاش إنسان أناني ... الأنانية مبتوصلش لحتة ... و لو وصلتك هترجعك تاني لمطرح ماجابتك ... لو إنتا في الشارع و إديت لحد غلبان فلوس و دعالك دعوة حلوة .. كدة فرحتك بالدنيا .. لو حد من صحابك مكتئب و إنتا قلتله نكتة ضحكته .. ياااه دنتا تبقى مية مية ... لو رحت دار أيتام و لعبت مع العيال و لقيتهم مبسوطي حواليك ... سبحان الله على السعادة اللي هتلاقي نفسك فيها ... الإنسان ميحسش بطعم الحياة إلا ميبقى السبب في إن إنسان تاني يبقى سعيد بسببه والله ...

و من الآخر كدة Don't Worry and Be Happy :)