الثلاثاء، ديسمبر ٢٣، ٢٠٠٨
الخميس، ديسمبر ١١، ٢٠٠٨
الخميس، نوفمبر ١٣، ٢٠٠٨
دليل السعادة بتاعي :)
السعادة سهل تتحقق .. مش صعبة والله ..أي حد ممكن يبقى سعيد لو مشي على المبادئ دي :
● خليك ريلاكس.متقفش على نفسك.متاخدش الحياة بطريقة جد عن اللزوم.مالحياة ماشية ماشية ... قال يعني لو عقدتها هتمشي على مزاجك! خليك فريش كدة و متفكرش في الحياة و تحللها بطريقة مأساوية و تقف على كل حاجة تحصلك أو تتقالك و تندب حظك و تقول أنا أصلاً حظي وحش أو الدنيا بنت التيييت دي معاندة معايا أو مدياني وش بلاستيك! متضغطش على نفسك بالتفكير في أمور إنت ملكش يد في تغييرها... المشكلة دي من أكبر الأسباب اللي بتولد مرض الضغط و بتسبب مشاكل جسمانية و نفسية كبيرة! حاول تضحك دايماً و تخلي الضحك ده جزء من روتينك العادي ...الضحك ده علاج فعال جداً لأي مرض في الدنيا ... و بيخلي الحياة أسهل بجد ... بس مش هيمحي المشاكل يعني .. ماهو الحياة عمرها ما هتكون حلوة لو كلها مشيت على نبرة واحدة حلوة أو وحشة ... يوم حلو و يوم وحش ... هي دي الدنيا .. بس النقطة هنا ... يا ترى أنا في الآخر اللي هضحك ولا الدنيا اللي هتضحك عليا!!
● إبتسم. أد إيه الإبتسامة دي هتفرق جداً معاك. في ناس بتصحى من النوم مكشرة و كفرانة من عيشتها و تلاقي يومهم بقى مهبب و منيل و كله مواقف وحشة.و فيه ناس بتصحى عارفة إن يومها هيبقى متعب و مجهد بس بيبقوا مبتسمين و سبحان الله ييجوا آخر اليوم تلاقيهم مبتسمين برضه و الحياة حلوة. الإبتسامة لوحدها بتخلي الجسم نفسه ريلاكس .. مانتا إديته الإنطباع إنك سعيد فطبيعي الجسم يبقى مستريح و الدم بيجري على مهله في عروقك و حواجبك مش لازقة في بعضها.ثانياً الإبتسامة نفسها و هية مرسومة على الوش كدة بتخلي اللي قدامك يستريحلك و يتعامل معاك بسلاسة أكتر سواء في الشغل أو في الحياة عامةً و ده يخلي الحياة أسهل طبعاً.
● متركزش في الحاجة الوحشة و بس. دايماً فكر في الحاجة الحلوة. عمر ما في إنسان في الدنيا دي مفيش عنده حبة حزن في حياته..مفيش حد سعيد طول الوقت أساساً.بس اللعبة هنا بقى في إني أخلي السعادة تطغى على الحزن أو الكآبة.صعب إن حد يغير الماضي .. بس مش صعب إننا نستمتع بالحاضر و نسعى إن المستقبل يبقى أحلى و أحلى ..القصة هنا كلها في إني أتقبل اللي حصللي خلاص مهما كان و أتعامل على الأساس ده من غير الإحساس الفظيع بالعجز .. الإنسان اللي متقبل حياته بكل الل فيها و كان فيها من حلو و ووحش ... ده إنسان سعيد.
● خليك دايماً راضي بحياتك و شاكر لربنا إنه وهبك حياتك اللي إنتا فيها. عمر ما إي إنسان هيبقى سعيد لو مش راضي بحياته واللي ربنا قاسمهولوا.أخطر حاجة أي بني آدم ممكن يعملها إنه يقارن حياته بحياة حد تاني! الإنسان لو إقتنع إن في الدنيا دي مفيش حد أحسن أو أوحش من حد بس ربنا قسم الرزق بطريقة معينة و ليه حكمته فيها أكيد .. هيبقى سعيد و في قمة الرضا بحياته و هتلاقيه دايماً بيقول " أنا كدة ميت فل و أربعتاشر :) " .. لو حد عارف إشمعنى أربعتاشر يقوللي :)
● من الحاجات اللي ممكن تخلي أي واحد يتقلب 180 درجة من قمة سعادته لقمة حزنه إن حد ينقده!مش معنى إن حد ينقدك إنه بيكرهك مثلاً او إن إنتا إنسان وحش .. على العكس ده معناها إن اللي بينقدك ده أصلاً مش راضي عن نفسه كمان! و خليك دايماً صديق نفسك الأنتيم .. خلي الصراحة بينك و بين نفسك شيئ أساسي .. دايماً حاول تشوف نفسك بكل صراحة و إنتا هتعرف فعلاً إذا كنت إنسان وحش ولا حلو.
● دايماً فكر في الأهداف اللي تخليك سعيد على المدى الطويل مش القصير. الأهداف اللي مداها قصير متعتها لحظية و بتسيبك في حالة أسوأ من الأول زي المخدرات مثلاً ... تلاقي واحد متضايق قاللك بس مفيش غيرها ..سيجارة ملفوفة مع كوبايتين أصفرة و الموود هيبقى آخر تظبيط ... يضرب يضرب يضرب و بعد كدة تلاقي مش دريان بالدنيا .. أول ميفوق تلاقيه مخنوق من الدنيا أكتر من الأول!!! طب إيه الفايدة والنبي طيب!! الواحد لو عايز يبقى أسعد لازم يفكر في أهداف تفضل سايبة بصمتها في حياته و تدوم مع الوقت .. مش مجرد متعة لحظية و بتعدي!
● دايماً حاول تركز إن تفكيرك ذات نفسه يبقى حلو و سعيد و صحي كمان! لأن تفكيرك هوا مووودك هوا اللي بيخلي إحساسك سعيد أو مش سعيد ... خلي تفكيرك إيجابي مش سلبي .. يعني متفكرش في الحاجة اللي تنرفذك أو تضايقك أو تقلب مزاجك أو تعصبك أو حتى تحزنك.. فكر في حاجة حلوة ... حاجة تخليك تحس إنك مبسوط و فريش ... فكر في موقف ظريف .. مسرحية كوميدية ... حد بتحبه .. كل دي حاجات أكيد هتديك إحساس جميل.
● طور من علاقاتك الحياتية و الإجتماعية .. دايماً الإنسان السعيد في حياته تلاقيه ليه علاقات بناس كتير و الناس بتحبه و بتحب صحبته كمان.من الحاجات المهمة عشان الناس تحبك إنك تبقى إنسان محترم و مش قليل الأدب. و دايماً متخليش علاقاتك مع الناس علاقات سطحية .. أي حد بيحب اللي يسأل عليه و يهتم بيه .. أي إنسان محصور في نفسه و في حياته .. و يحب أوي اللي يهتم بيه و بحياته و يسأل عليه مثلاً و يعرف أخباره أول بأول.
● دايماً إختار أصدقائك بعناية .. الأصدقاء هدية ربنا لينا .. دايماً الصديق اللي بجد ممكن يكون أقربلك من أخوك اللي هوة إنتا و هوة من بطن واحدة .. فحاول إنك تختار أصدقائك بعناية لأنهم هيفرقوا معاك أوي ..
الخميس، أكتوبر ٣٠، ٢٠٠٨
الاثنين، أكتوبر ٢٧، ٢٠٠٨
Arabic Typo widescreen wallpaper
الأحد، أكتوبر ١٩، ٢٠٠٨
الأربعاء، أكتوبر ١٥، ٢٠٠٨
الثلاثاء، أكتوبر ٠٧، ٢٠٠٨
إديها ريحة
أنا هجيب من الآخر ... الريحة اللي أي بني آدم بيحطها هتبقى حاجة من إتنين : يا معاك .. يا عليك! ملهاش وسط ... يا إما تبقى ريحتك حلوة يا إما وحشة ... طبعاً لو ريحة الجسم طبيعياً حلوة مع العرق بقى و الجو الجميل هتلاقي اللي حواليك مبسوطين بيك أوي و مش عاوزين يقربوا منك أساساً!! إنما بقى لو ريحتك حلوة ... يا سيدي يا سيدي .. هتلاقي نفسك كدة منشكح و مبسوط ... واللي حواليك نفس النظام برضه :)
المفروض طبعاً أي إنسان بيحاول يظهر بصورة و بشكل جميل من خلال شكله و لبسه و طريقة لبسه و طريقة كلامه و ألفاظه نفسها ... و الريحة دي حاجة اساسية من الحاجات اللي بتظهرك بشكل شيك و جميل برضه ... و بتسيب في نفس أي حد يقابلك نَفَس جميل ... و زي مبيبقى عندك بدلة و إتنين أو جزمة و إتنين ... المفروض يبقى عندك برفيوم و إتنين.
المشكلة في البرفيوم إن في ناس كتير أوي مش بتعرف تستخدمه صح ... تلاقي واحد بيرش على نفسه ريحة زي ميكون ماسك مبيد حشري و بيموت صرصار ماشي على رقبته!!! و تلاقي الريحة بقت نفاذة لدرجة إن مناخيرك تشتكي! و دي طبعاً مش حاجة حلوة ... و كمان مش أي برفيوم يمشي مع أي حد ... ممكن تلاقي واحد صاحبك حاطط برفيوم ريحته حلوة أوي عليه ... بس عليك متبقاش حلوة أوي كدة ... وده بقى سببه إن كيميا الجسم نفسه بتتفاعل مع البرفيوم و مش كل كيميا زي التانية فعشان كدة مش كل ريحة حلوة على حد تبقى حلوة على اي حد تاني.
و طبعاً بيبقى فيه روايح خفيفة لايت كدة و فيه روايح تانية نفاذة ... و مش أي حاجة تتحط في أي وقت ... يعني ظريف إن و إنتا رايح الشغل تحط برفيوم .. بس المفروض تبقى حاجة خفيفة و مش نفاذة ... الروايح النفاذة دي بتمتزج بهرمونات الجسم أقوي و بتثبت أكتر عشان كدة بتبقى قوية و ملحوظة .. فممكن مثلاً و إنتا خارج مع صحابك أو مع خطيبتك أو مراتك تحط ريحة قوية و ممكن لو خارج مع حماتك تحط سم فيران بقى :) بهزر طبعاً :)
و إنتى بتحط ريحة بقى خلي بالك إن لو عاوز الريحة تستمر معاك يبقى متحطهاش كدة و خلاص .. لأ خليك إستراتيجي :) رشتين تحت الودان هنا و هنا ... تحت الدقن ... أهم حتة تحت الرقبة على طول عشان الجزء ده الريحة بتثبت فيه و بتنتعش بقى .... و لما تيجي تحط ريحة يا ريت متغرقش نفسك فيها ... مش معنى إنك مش شاممها إنها مش موجودة ... ده بس عشان إنتا إتعودت عليها .. الريحة لما تتحط بسيط بسيط كدة بتبقى حلوة عشان هية كدة كدة بتمتزج مع الجسم و بتقوى مع الوقت.
و طبعاً يا ريت و إنتا رايح تجيب ريحة تجرب الأول عليك ريحتها عاملة إزاي ... فيه في اي ستور كبير زي Faces مثلاً أزايز كدة Testers عشان تجرب منها ... جرب ولا يهمك لحد متلاقي اللي إنتا حاسه مناسب ليك ... و خد رأي الناس برضه.
بس خلاص كدة أعتقد محدش ليه حجة إن ريحته تبقى و حشة بقى :)
الأحد، أكتوبر ٠٥، ٢٠٠٨
LOVE
ˇˇ I ain't lonely now. Yeah, I got someone to love. ˆˆ
ˇˇ Don't forget to love yourself. ˆˆ
الاثنين، سبتمبر ٢٩، ٢٠٠٨
Another 10 Pieces of My Artworks
Emsakeyet Ramadan
السبت، أغسطس ٣٠، ٢٠٠٨
10Pieces of My Artworks
.:: I sketched it first,then vectorized it in Illustrator CS3 ::.
" Visit My Own World "
.:: a world full of colours ::.
" You'll never get tired of staring at something you think is Beautiful "
.:: Photoshop CS3 ::.
" Up from the Ashes "
.:: Elvis Presley 'the king' Pop Art ::.
" Energy "
.:: iLLusion.Colours ::.
" I might be Dangerous "
.:: Painted in Corel Painter X ::.
.:: Photomanipulation ::.
" In my Restless Dreams "
.:: in my restless dreams ::.
الاثنين، أغسطس ٢٥، ٢٠٠٨
... لو بتحب الساعات
أي حد جرب ينزل يشتري ساعة قبل كدة أكيد لاحظ أد إيه الموضوع ده صعب ... و إن موضوع إختيار الساعة ده مش بالساهل كدة .. على الأقل للي بيفهم في الساعات ؛ من كتر ما نزلت مع صحابي لما بييجي حد يشتري ساعة ولا حاجة .. كنت بلاحظ إن فيه حاجات كتيرة مبتبقاش مفهومة ... حتى أكتر الناس شياكة ممكن يتلخبط كتير لما ييجي يشتري ساعة تعمر معاه!
عالم الساعات ده عالم معقد ... و الساعات عامة غالية مش رخيصة و المشكلة إن مجال الإختيار فيها واسع جداً .. أنواع كتير و كماليات كتير و أشكال أكتر.
المفروض أي حد هييجي يشتري ساعة يفكر الأول كدة .. و يسأل نفسه .. يا ترى إمتى هلبسها و فين؟ و أنا رايح الشغل مثلاً, ولا و أنا رايح الجيم, ولا و أنا رايح مقابلة رسمية ,ولا و أنا خارج مع صحابي ... طب سؤال تاني , يا ترى إيه اللي ممكن يعجبني في الساعة ؟ إنها تكون معقدة و بتعمل كل حاجة... ولا بسيطة كدة و سامباتيك ؟ ... طب سؤال كمان مهم أوي .. يا ترى أنا هدفع أد إيه في الساعة ؟؟ ﱠماهو زي ما تقدر تجيب ساعة ب 15 جنيه من على أي فرشة في رمسيس ... زي ما فيه ساعات بيوصل تمنها لأكتر من مليون جنيه ... و كله بتمنه بمعنى أصح!
ﱠ-------------------------------
▪ Aperture: هية شباك في وش الساعة بيبين معلومات معينة زي التاريخ مثلاً
الأحد، أغسطس ١٧، ٢٠٠٨
مقدمات محبوبة
ليالي الحلمية
البخيل و أنا
بكيزة و زغلول
المال و البنون (للسمع مش للفرجة)
الضوء الشارد
يوميات ونيس
أرابيسك
الخميس، أغسطس ١٤، ٢٠٠٨
الرجالة مبقوش زي زمان :)
بس دلوقتي بقى ... يا ترى الدنيا لسة زي ما هية ؟ :)
----------------
1- الرجالة ملهمش في المطبخ :
ده كان زماااان ... دلوقتي الشيف أسامة السيد ربنا يخليه مسح الفكرة دي من الوجود .. أصلاً كل الطباخين اللي في الفنادق الكبيرة و المطاعم رجالة!
يا حلاوة الراجل كدة بمريلة المطبخ و هوة بيشهق في حلة الملوخية :)
2- الرجالة بياكلو أي حاجة مبيفرقش معاهم :
لأ بيفرق بقى ... آل أي حاجة آل .. أيام العصر الحجري كان ممكن الراجل ياكل أي حاجة و هو مغمض عينيه .. لكن دلوقتي مفيش الكلام ده .. إحنا في زمن الدايت و الأكل المِتنأي و كل واحد ليه نظام أكل معين و بحب آكل كذا بأة و مبحبش آكل كذا و كل واحد يتأمر زي ماهو عايز :)
يا ريت كل واحد عنده كِرش يفكر يتأمر شوية على كِرشه يعني ;)
3- الرجالة ملحوسين بالعربيات :
أوك, دي يمكن حقيقة آه .. بس حقيقة مرتبطة بالشباب مش كل الرجالة .. يعني مش كل الرجالة بيمشو في الشارع عارفين كل أنواع و موديلات العربيات في الشارع, مش كلهم مشتركين في مجلة " أوتو كار ", مش كلهم متابعين الأوتوكروس و مش كلهم بيخمسوا و يفوتوا و بياخدو غُرز!
4- الإيطاليين أشيك رجالة :
من أول الساعات للجزم للبِدل للعربيات لآخر الليستة,الإيطاليين فعلاً ناس بيفهموا في الشياكة .. و ده طبعاً بفضل حضارتهم اللي بتشجعهم يظهروا دايماً بشكل كويس.
بس دلوقتي الشياكة مبقتش مقتصرة عليهم هما بس, مالأمريكيين و الفرنسيين و الألمانيين و اليابانيين و المصريين بالذات ناس آخر شياكة برضه ... أًمال إيييه دحنا جامدين أوي :)
5- الرجالة مبيستخدموش كريمات ولا مستحضرات تجميل :
حالياً أشًك!
6- الرجالة بيحاولوا يتفادوا الدكاترة بأي طريقة :
يمكن آه فعلاً أنا نفسي كدة .. بس حالياً مع الثورة التلوثية اللي إحنا فيها و التوعية الطبية اللي برضه إحنا فيها (!) بقى اللي يكح بس يجري جري يطلع على الدكتور عشان ياخد الدوا .. واللي معندوش حاجة برضه بياخد الدوا عشان ميجرالوش حاجة ... يعني الدكاترة حالياً بقو على قفا مين يشيل ليييه ؟؟ عمر حد راح عيادة ولا مستشفى و لقاها فاضية؟!
ربنا ديم علينا الصحة نعمة .. آمييين !
7- الرجالة لازم يكونو بيشربوا :
ليه دايماً بنلاقي صورة الراجل مرتبطة بسيجارة ولا إزازة بيرة ولا خابور حشيش ؟! ليه كل شاب في سن المراهقة أول ميحب يحس إنو بقى راجل يقوم يشرب سجاير ؟! ليه في كل الأفلام اللي بنشوفها لازم نلاقي شرب السجاير بيرمز للرجولة أو الخطورة أو الصياعة أو أو أو ... و كلها حاجات الشباب بيحاول يتقمصها فميشوفش أدامه غير السيجارة هية اللي هتخليه كدة ؟!
أنا متأكد إن مش أقل من 60% من اللي بيشربو سجاير إبتدو بيها منظرة و قلبت بعد كدة معاهم بعادة أو إدمان!
و الحشيش بقى نفس القصة ... وهم كبيير بيعيشه اللي عاوز يعيشه!
عامةً خلاصة الكلام إن الراجل مش عبارة عن سيجارة ... مش السيجارة هية اللي هتخلي الواحد راجل!
8- الرجالة مبيحبوش الشوبينح :
ههههههههه ... إديني فيزا جولد في إيدي و وديني كارفور و أناأثبت فشل النظرية دي تماماً!
9- الراجل ميعيطش :
مع إن الراجل ده بني آدم برضه و بيحس .. ولا إيه ؟؟
عامةً اللي ليه رأي مغاير لكلامي يا ريت يفحمني بيه :)
اللهم ارزق كل بنت بعريس هدية
وكل شاب بوظيفة وشقة وعربية
اللهم أحرق الـ0900 واضرب الحرامية بالحرامية
ونجح أي طالب في أي كلية حتى ولو كان في التربية الموسيقية
الهم نجنا من الوقفه للعيش في الطابور ومن اكل الفراخ ام انفونزا الطيور
آآآميين يارب
يا بلــــــــــــدى يا عجيبة
فيكى حاجــــــــة مجنناني
نزرع القمح في سنيـــــــن
يطلع القرع فى ثـــــــوانى