الاثنين، أغسطس ٢٥، ٢٠٠٨

... لو بتحب الساعات


مين مبيحبش الساعات ؟ سواء كانت الساعة في كونها ساعة أو في كونها حاجة شيك بتتلبس في الإيد أو في كونها دليل على إن اللي لابسها ده واحد مظبوط في مواعيده و مخلي باله من الوقت أوي ( في معظم الأحيان بتبقى واقفة :)
أي حد جرب ينزل يشتري ساعة قبل كدة أكيد لاحظ أد إيه الموضوع ده صعب ... و إن موضوع إختيار الساعة ده مش بالساهل كدة .. على الأقل للي بيفهم في الساعات ؛ من كتر ما نزلت مع صحابي لما بييجي حد يشتري ساعة ولا حاجة .. كنت بلاحظ إن فيه حاجات كتيرة مبتبقاش مفهومة ... حتى أكتر الناس شياكة ممكن يتلخبط كتير لما ييجي يشتري ساعة تعمر معاه!
عالم الساعات ده عالم معقد ... و الساعات عامة غالية مش رخيصة و المشكلة إن مجال الإختيار فيها واسع جداً .. أنواع كتير و كماليات كتير و أشكال أكتر.
المفروض أي حد هييجي يشتري ساعة يفكر الأول كدة .. و يسأل نفسه .. يا ترى إمتى هلبسها و فين؟ و أنا رايح الشغل مثلاً, ولا و أنا رايح الجيم, ولا و أنا رايح مقابلة رسمية ,ولا و أنا خارج مع صحابي ... طب سؤال تاني , يا ترى إيه اللي ممكن يعجبني في الساعة ؟ إنها تكون معقدة و بتعمل كل حاجة... ولا بسيطة كدة و سامباتيك ؟ ... طب سؤال كمان مهم أوي .. يا ترى أنا هدفع أد إيه في الساعة ؟؟ ﱠماهو زي ما تقدر تجيب ساعة ب 15 جنيه من على أي فرشة في رمسيس ... زي ما فيه ساعات بيوصل تمنها لأكتر من مليون جنيه ... و كله بتمنه بمعنى أصح!
ﱠ-------------------------------

خلاص قررت هتلبس الساعة إمتى و فين و الستايل اللي هيليق معاك إيه أو اللي إنت عاوزه إيه ... متيجي نبص بصة كدة على أنواع الساعات و مكوناتها المهمة ... يعني عشان الواحد يبقى عارف هيشتري إيه قبل ميشتريه.

Analog, digital or analog/digital :

بالنسبة للساعات ال"Analog" فهي الساعات اللي بيبقى فيها عقرب ساعات و دقايق و ثواني ... و طبعاً النوع ده من الساعات يعتبر كلاسيك و فورمال شوية و مناسب للشغل و الإجتماعات و المناسبات الرسمية و البدل طبعاَ و اللبس الكلاسيك عامةً ( و لو رايح تخطب ولا حاجة يا ريت تبقى لابس ساعة analog محترمة كدة و شيك :)


بالنسبة بقى للساعات الديجيتال فدي اللي بتبقى عبارة عن شاشة LCD صغيرة كدة بتعرض الساعة رقمياً ( زي 3:05 مثلاً ) ... و دي تعتبر كاجوال و متنفعش تلبسها لو إنت رايح شغل ولا حاجة رسمية شوية , و متليقش غير على اللبس الكاجوال.
الساعات ال "analog/digital" بقى بيبقى فيها النوعين الأولانيين دول في بعض .. يعني فيها مثلاً عقارب بتلف و شاشة LCD صغيرة أوي بتعرض التاريخ مثلاً ... والنوع ده من الساعات يعتبر عملي, عادي ممكن تلبسه و إنتا خارج أو وإنتا رايح الشغل برضه .. بس متنفعش في مناسبات رسمية ولا على لبس كلاسيك ...



Battery, quartz or mechanical:

الساعات الديجيتال طبعاً معروف إنها بتشتغل بالبطارية الصغيورة أوي أوي دي زي اللي في الآلات الحاسبة واللي ممكن نشوفها مرمية زي الترمس كدة في طبق صغير عند أي حد بيصلح ساعات


بالنسبة للساعات ال"analog", معظمها بيبقى فيها كريستالة كوارتز بللورية صغيرة أوي و مشحونة , والنوع ده بيحافظ على دقة الساعة لدرجة إن نسبة الغلط فيها ممكن ميتعداش دقيقة كاملة في السنة كلها



فيه نوع بقى من الساعات بيشتغل ميكانيكياً ... يعني بتبقى من جوا عبارة عن تروس كتيرة و معقدة جداً بتدور مع بعض بطريقة معينة .. و طبعاً النوع ده من الساعات بيبقى غالي جداً لأنه بيتعمل يدوي" handmade" ... بس المشكلة إن مع كدة فن صناعة الساعات يدوياً من زمان عمره ما كان بيطلع ساعة مظبوطة مية في المية .. شغلانة صعبة أوي الصراحة بالنسبة لواحد بيشتغل في ساعة معقدة و أصغر من كف إيده أصلاً!

--------------------------


بالنسبة للـ"frame"بتاع الساعة برضه عنصر مهم في شكل الساعة لأن هوة ده وش الساعة بمعنى اصح...

بالنسبة للساعات ال"analog" ال"frame" بتاعها ممكن يبقى مدور أو مربع أو مستطيل أو يكون ليه أضلاع مش متناسقة حتى حسب التصميم بتاعها يعني ... و ممكن يبقى بيلمع أو مطفي أو عليه نقش بشكل معين أو مرصع بالمجوهرات أو الكريستال (طبعاً بتبقى حريمي)؛بالنسبة لنوع ال"frame" نفسه ممكن يكون مصنوع من معدن عادي أو من "stainless steel" أو من الفضة أو الذهب أو التيتانيوم أو البلاتينيوم ( و هوة ده اللي بيُستخدم عادةً ) ... و طبعاً الذهب و الفضة و التيتانيوم خامات غالية جداً و عشان كدة في ساعات بتتعمل بخلط الذهب مثلاً مع خامة رخيصة شوية بحيث تكلفة الساعة متبقاش ضخمة .. و طبعاً بيتكتب ده على ظهر الساعة بالقيراط ( ال 18 قيراط يعني 75% ذهب صافي و بتبقى غالية جداً طبعاً, وال 14 قيراط يعني 58% ذهب, و ال10 قيراط يعني حوالي 40% ذهب )
------------------------
بالنسبة للوش الكريستال اللي بيحمي الساعة .. ممكن يتعمل من حاجة إسمها برسبكس ( بلاستيك أكتر منه إزاز) و ده نوع رخيص و معروف إنه مبيتكسرش بسهولة .. بس بيتخربش بكل سهولة ؛ و فيه حاجة إسمها الزجاج المعدني و ده مبيتخربش جامد زي البرسبكس بس بيتكسر بسهولة ؛ وفيه بقى السفير ... وده أكتر نوع غالي... بيقاوم الخربشة و مبيتشرخش خالص بس بيتكسر بسهولة.
------------------------
فيه بقى أنواع تانية خالص من الساعات زي الساعات الخاصة بالغواصين أو الرياضيين أو الطيارين ... بتبقى الساعة مصنوعة من خامات بلاستيكية جودتها عالية عشان تستحمل جامد , و في نفس الوقت بتبقى مليانة حاجات غريبة ... زي عداد مسافات مثلاً أو بوصلة أو مقياس لضغط الدم أو تقنية GPS ... عامةً "NIKE" متخصصة في النوع ده من الساعات.

-------------------
بالنسبة للبس الساعة نفسها .. عشان يبقى شكلها حلو و مظبوط في الإيد, المفروض متبقاش ماسكة على الإيد جامد و تبقى سايبة علامة مكانها و كدة .. أول حاجة مبيبقاش شكلها حلو و تاني حاجة ممكن تحبس الدم مكانها , و على العكس من كدة المفروض متتحركش مع دراعك في الطالعة و النازلة و إلا هيبقى باين إنها واسعة أوي على الدراع ... خير الأمور الوسط .. لا تِقفش ولا تفلت.
--------------------

بالنسبة للي يحب يبقى فاهم في عالم الساعات شوية و لما حد يتكلم على الساعات معاه أو يسأله يبقى فاهم أو حتى لو نازل يشتري و يبقى فاهم بيشتري إيه ... أنا جمعت حبة مصطلحات كدة .. مستخدمة على طول يعني .. يا رب تبقى مفيدة بقى :)

Aperture: هية شباك في وش الساعة بيبين معلومات معينة زي التاريخ مثلاً


Applique: نقوش بالأرقام بتاعة الساعة على قرص الساعة اللي حوالين وش الساعة


ATM: و ده بإختصار كدة مقياس لمدى تحمل الساعة للضغط الجوي تحت مستوى البحر ( 1ATM=10Meters)




Chronograph: و هوة الـ"stopwatch" بمعنى اصح بس اللي بيبقى في الساعات الـ"analog"



Chronometer: و المصطلح ده بيبقى للساعات الدقيقة جداً و بيتم "منح" اي ساعة اللقب ده بعد أما يتم قياسها لمدة 15 يوم و ليلة في خمس أماكن مختلفة و في درجات حرارة مختلفة .. لو الساعة نجحت في الإختبار بيبقى إسمها Chronometer وده طبعاً بيغلي من سعر الساعة جامد لأنها بتبقى دقيقة و بشكل رسمي ( بيتم إختبارها بواسطة المركز السويسري للقياسات )


Gasket: هية بتاعة كدة زي حِشية بتغلف ظهر الساعة و وشها عشان تحميها من المية و تبقى الساعة ضد المية ... و البتاعة دي بتحتاج يتعملها check كل سنتين على الأقل عشان تفضل مضادة للمية.



Guilloche: عبارة عن زخرفة دقيقة على قرص الساعة الخارجي بتبقى في الساعات الغالية أوي.


Luminous Paint: و هو طبقة بتتدهن بيها عقارب الساعة أو الأرقام عشان تنور في الضلمة ... فسفوري يعني


Telemeter:خاصية في بعض الساعات المتقدمة .. عاملة زي الstopwatch كدة بس بتحسب مسافة شيئ معين عن الساعة عن طريق إستخدام سرعة الصوت.
Waterproof: طبعاً ده معناها إن الساعة ضد المية ... بس عامةً مفيش ساعة ضد المية 100%.
----------------------------

هناك ٩ تعليقات:

maha يقول...

حلو اوي الموضوع ده بجد
بس انا ملاحظة ان الموبايل دلوقتي بقي يغني عن الساعات اصلا

M!DO يقول...

لا على العكس الساعة مفيش حاجة تغني عنها ... يعني تعرفي تلبسي الموبايل في إيدك :) ؟

maha zein يقول...

ياه
بقه كل ده
ايه يا ابني انت ساعاتي
بس حلو جدا موضوعك
وجديد
يا ابن الايه
سوسة وواعي كده
بس عارف
انا برغم انى احب الساعات اوي واحترمها
الا اني للاسف بخاف البسها
ليه بقه
لاني مش بعرف في الساعة
يعني مش بعرف يعني العقرب واقف كده فين
ولا ايه
فلو الناس سالتني
بخاف اوي
وببقه هعيط
وبقول اما مش مظبوطة
والناس تبصلي بارف وتقول هي مالها لابساها ليه طيب
واما بقه ابص كتير واروح قايله الساعة 4 ونص وعشرة
غلب والله
بس استر عليا
ارجوك

M!DO يقول...

ياااه ده الساعات دي مفيش أسهل منها ... تعالي أديكي كورس فيها و إنتي إديني كورس في التنمية البشرية و بكدة نبقى خالصين :)
على فكرة المدونة بتاعتك الرئيسية من المدونات المفضلة عندي

Raw يقول...

I don't mind you using my watch battery picture on my website, but you should state where you got the pic from, or make the picture clickable to my website! Thanks, Jewelry-Secrets.com

M!DO يقول...

It's clickable by the way !

غير معرف يقول...

سارة
ــــ

ازيك ياميدو انا ساره اللي انت علقت ليا في مدونه اقلع همومك ميرسي جدامعلش علي تأخيري في الرد انا بقالي فتره مكنتش موجوده ولسه شايفه تعليقك... معلش اعذرني مش هينفعك فعلا اجي الجمعيه اللي قلتلي عليها بس انا الحمد لله في طريقي للخير

تعليقاتكم اثرت فيا اوي.

مدونتك جميله وبوستاتك جميله برده صراحه انا تخيلت ان هدخل هلاقي مشاكل او كده اتفجئت ببوست الساعه

وكل سنه وانت طيب

M!DO يقول...

You are welcome Sara =)

maha يقول...

almob bytshal btr2a asahal alsa3a aslan btb2a t2ela wa bt3ml 7sasaya

اللهم ارزق كل بنت بعريس هدية

وكل شاب بوظيفة وشقة وعربية

اللهم أحرق الـ0900 واضرب الحرامية بالحرامية

ونجح أي طالب في أي كلية حتى ولو كان في التربية الموسيقية

الهم نجنا من الوقفه للعيش في الطابور ومن اكل الفراخ ام انفونزا الطيور

آآآميين يارب




يا بلــــــــــــدى يا عجيبة

فيكى حاجــــــــة مجنناني

نزرع القمح في سنيـــــــن

يطلع القرع فى ثـــــــوانى